A COMTE S. AGNAN
Esprit genereux et sublime,
Grand heros que la France estime,
Autant qu'un prince, et haye au bout,
Qui bel et bon estes par tout,
Depuis les pieds iusqu'à la teste,
Depuis le bas iusques au feste,
De long de costiere en quarré,
De qui mont de chose est narré,
Et dont la valeur en cronique,
Malgré les ans fera la nique,
À Mademoiselle Atropos,
Ainsi qu'à ce faucheur dispos,
Le temps, lequel aussi bien qu'elle,
Par vos faits en aura dans laisle:
Eustil cent faux en son pouuoir,
Aussi tranchantes qu'un rasoir,
Et machoire assés accrée,
Pour manger charette ferrée,
Car tant qu'en ces bas lieux sera,
Gent qui sçaura lire on lira.
Dedans le temple de memoire,
Les monumens de vostre gloire,
Qui comme jarretay dit durera,
In sempiterna saecula,
En bon françois cela veut dire,
Qu'on verra dans ce bas empire,
Tout ce qui vit en l'uniuers,
Mangé des mittes et des vers,
Plutost que vostre gloire morte,
Que dans son front l'histoire porte,
Sans qu'un astre malicieux,
Ny que le demon enuieux,
Qui les dens à comme une herse,
Luy fasse jamais trou ny perse,
Car vous n'estes pas dieu mercy,
De ces preux faits, coussi, coussi,
De ces vaillans à la douzaine,
De ces heros miton mitaine,
En qui ce beau nom reueré:
Paroist autant des-honoré,
Qu'il est en sa plus haute gloire,
En vostre nom qui de l'histoire,
Sera le plus digne ornement,
Qui des vertus tousjours amant,
À vertus faites bonne chere,
Qui fieres gens ne craignés guerre.