François Bérenger De La Tour d'Albenas En Vivarez (1529?-1559?) A N. Albert, Seigneur de sainct

A N. Albert, Seigneur de sainct
Alban, B. de la Tour,
desire felicité.

Ces jours Natalz, qu'on retire l'esprit d'entre l'enclume, et le marteau
des negoces, vous envoye les restes de ma jeunesse comprinses en ce
livre, qui ne tenant d'aloy pour souffrir les supplices de la
publication, entre les flots des opinions vulgaires, se contrastans plus
que la mer aux opposées bouches de Eole: ha dormy en tenebres, Jusques
aujourd'huy que je l'ay mis en vie: non pour sa liberté publique, Mais
comme ostage de mon affection envers vous, (nous estans donnez la main
d'amitié perpetuelle,) lequel, ainsi que nouveau fruict, s'il nourrit
peu, donnera au moins appetit à viandes plus solides, ja preparées en
mon siecle des siecles en poesie, et Orient de Grece, histoire, ou
prose, non moins desirée pour son antiquité de ceux qui en ont veu les
fragmens, que de moy tenue secrette, attendant le loisir pour vous la
fere voir. Tous lesquelz discours sembleroyent estre loings de ma
vocation des loix, sans le Philosophe Thebain, duquel aux jeux d'olimpe
s'esmerveillant le peuple, de ce qu'il avoit tissus ses vestementz,
escriptz, et composez ses livres, et en soy n'avoit chose que de sa main
il ne l'eust faicte respondit, la negligence des hommes estre cause de
la division des Ars. Car ce que tous scavent ensemble, un seul est
obligé scavoir: Lequel ores qu'il promist n'ignorer ce qu'il monstroit,
ne vouloit pourtant Inferer entendre toutes choses. Comme aussi ne fay
je, ny les nombres Poetiques, Ainsi que par la monstre de ce livre est
cler à voir, les conferant aux Homeres francoys, dont le nom ne peut
tumber aux tenebres d'obly, ny perir fors avec la memoire des siecles
que juge en mes vers plusieurs choses à revoir, outre celles ou l'envie
ha coustume se prendre: Dont les suppostz je compare aux pinceteurs des
draps (office mecanique) iceux purgeans des noudz & festus seulement,
sans intelligence qu'ilz ayent du lanage, filasse, Couleur, ou Tissure.
Car taisant le bien qu'ilz ne peuvent comprendre, font grand cas des
motz adaptez à nostre langue, qu'ilz baptisent peu graves, ou peu
francoys: des poinctz: des lettres versalies, ou l'orthographe qu'ilz
disent trop loing, ou proche de la prolation, en quoy seroit plus facile
mettre reigle aux vestementz francoys: Veu qu'en tous deux la facon est
la moins certaine. Cecy est peu au pris de ce que je vous doy, et
beaucoup, puis que vient d'une volonté congnue: laquelle ne sera sans
monstrer nouveaux effectz qui Preserveront (aydant Dieu) La vie
d'oysiveté, et noz sepulchres d'obliance.