Guillaume Colletet (1598-1659) Le verd de may.

Le verd de may.

Sonnet.

Puis que vous m' ordonnez de me parer de vert
Pour imiter ce mois le plus beau de l' année,
Qui porte de bouquets la teste couronnée,
De galands beaux et verds je veux estre couvert.

Si c' est un jeu, Sophie, helas ! De quoy vous sert
De combler de malheurs une ame infortunée ?
La coustume de may chocque ma destinée,
Quand vous joüez un coeur qui souffre, et qui se pert.

Mais ce commandement m' est un heureux présage,
Que comme apres l' hiver le printemps nous soulage,
Ce vert estincelant effacera mon noir ;

Que vous adoucirez vostre humeur trop severe,
Et que prenant chez vous la couleur de l' espoir,
J' y cueilleray bientost le doux fruit que j' espere.