Guillaume Colletet (1598-1659) Souvenir amoureux.

Souvenir amoureux.

Sonnet.

Voicy la chambre mesme où Clarice éveillée,
Recevoit mes devoirs aussi-tost que le jour ;
Voicy la mesme table où cet astre d' amour
Remplissoit de splendeur une glace émaillée.

Voicy le mesme lit, où sans estre habillée,
Sa grace me monstroit cent graces de retour,
Où son front se paroit d' un agreable atour
Et resserroit en noeuds sa tresse esparpillée.

Voicy le mesme lit où ce divin soleil
Dans le sein du repos, ainsi que du sommeil
De ses rayons esteints rendoit l' ombre complice ;

Mais ô de mes amours le flux et le reflus !
Beaux lieux, où j' adoray les beaux yeux de Clarice,
Que me sert de vous voir, si je ne l' y vois plus ?